A jeni profesionist/e nga diaspora dhe dëshironi të jepni kontribut në Kosovë? 
 
Aplikoni përmes platformës për Angazhimin e Profesionistëve nga Diaspora (EDP), e cila synon të ndërmjetësojë angazhimin e ekspertëve nga diaspora në vendin e origjinës, në këtë rast pranë Komunës së Shtimës, Istogut, Rahovecit, Lipjanit, Podujevës, Vushtrrisë, apo Suharekës.
 
Sfondi dhe përshkrimi i aktivitetit:
 
Kosova ka një diasporë të madhe, e cila është shpërndarë në vendet më të zhvilluara të botës. Kjo diasporë, për fat të mirë, mbart një lidhje të fortë me atdheun, nga lidhjet familjare deri te institucionet dhe angazhimi ekonomik. Diaspora me origjinë nga Kosova përfaqëson një potencial të jashtëzakonshëm financiar, ekonomik, socio-politik, njohuri këto që mund të përdoren në shumë mënyra për të sjellë përfitim te popullata lokale dhe Kosova në përgjithësi. 
Barazia gjinore dhe pjesëmarrja aktive e grave në politikë nuk duhet të përkufizohen dhe maten vetëm me numra. Ajo që ka më shumë rëndësi është përfaqësimi substancial, hapësira që gratë kanë për të shprehur pikëpamjet e tyre dhe një angazhim i barabartë.
Ndër projektet tjera, GERMIN që nga viti 2022 është duke implementuar edhe projektin “Diaspora për Gratë në Politikë“, projekt ky që synon angazhimin e profesionistëve nga diaspora me qëllim këta të fundit të kontribojnë në avancimin e barazisë gjinore dhe fuqizimin e grave në politikë përmes ekspertizës dhe përvojës së tyre në politikë-bërje të fituara nga ekspozimi ndaj proceseve politike në vendet e zhvilluara. 
Specifikat e angazhimit:
Kjo nismë është krijuar për të angazhuar ekspertë në fushën si në vijim:



Barazia Gjinore

 
Shtatë (7) profesionistë të diasporës do të angazhohen për rreth tre (3) javë në formë fizike në njërën nga Komunat e përzgjedhura si: Komuna e Shtimës, Istogut, Rahovecit, Lipjanit, Podujevës, Vushtrrisë, dhe Suharekës. Si pjesë e këtij angazhimi, jemi të përkushtuar të sigurojmë mbështetje të përmbajtshme për mentorët tanë, duke siguruar që angazhimi i profesionistëve të jetë i efektshëm dhe i kënaqshëm. Ky angazhim 3 javor përfshin edhe kompenzim si: bileta e avionit, akomodimi dhe pagesë për ditë pune.
 


Detyrat që do të kryhen në kuadër të këtij angazhimi:
 

Dizajnimi dhe Planifikimi i Aktiviteteve Bashkëpunuese - Duke ofruar mbështetje strategjike, hartimin e aktiviteteve, planeve të punës dhe strategjive për periudhën 2026-2027 për Zyrën për Barazi Gjinore në Komunën përkatëse ku angazhoheni;
Rritja e Mekanizmave të Monitorimit dhe Vlerësimit - Duke punuar së bashku me Zyrën për Barazi Gjinore në (ri)shqyrtimin ose krijimin e mekanizmave efektivë të monitorimit dhe vlerësimit. Këta mekanizma do t'i mundësojnë komunës të gjurmojë dhe mbikqyrë zbatimin e çështjeve gjinore, duke siguruar progres dhe llogaridhënie.
Sesione tematike të trajnimit - Në bashkëpunim me Zyrën për Barazi Gjinore dhe stafin përkatës komunal,  të zhvilloni sesione tematike të trajnimit. Këto sesione do të fokusohen në tema specifike të lidhura me barazinë gjinore duke u dhënë pjesëmarrësve njohuri, aftësi dhe strategji për të trajtuar (pa)barazitë gjinore brenda roleve të tyre.
Zbatimi i Aktiviteteve Gjinore të propozuara nga Diaspora - Në koordinim me Zyrën për Barazi Gjinore, secila komunë partnere do të zbatojë të paktën një aktivitet lidhur me barazinë gjinore të propozuar nga profesionistët e diasporës. Këto aktivitete, të përzgjedhura me kujdes për të adresuar çështjet gjinore lokale, do të nxisin përfshirjen dhe fuqizojnë gratë. Qëllimi kolektiv është që të zbatohen së paku 7 aktivitete nëpër komunat partnere.
Përmbledhje e shkurtë politikash -  Krijimi i një përmbledhje politikash koncize me rekomandime të zbatueshme për Komunën përkatëse. Kjo përmbledhje do të fokusohet në rritjen e përfshirjes së grave në politikë, duke theksuar strategjitë për të përmirësuar rolin dhe ndikimin e tyre.

Kriteret:

Të ketë përvojë apo ekspertizë në njërën nga fushat e cekura në pjesën e secifikave të angazhimit; 


Të ketë të paktën një diplomë të fituar në universitet me nivelin e preferuar të arsimit - Diplomë Master ose ekuivalent - (lloje të tjera specifike të arsimit universitar të nivelit të parë, në kombinim me përvojën përkatëse,);


Të ketë pesë (5) deri në shtatë (7) vjetë përvojë pune në shtetin rezident;

 
Për të aplikuar, ju lutem ndiqni hapat e mëposhtëm:
 

Regjistrohuni KËTU.
Konfirmoni emailin.
Krijoni profilin tuaj në këtë platform KËTU.
Vizitoni KËTË thirrje dhe klikoni butonin APLIKO.

 
Data e fundit për dorëzimin e aplikimeve është 30 prill 2025. Nëse keni pyetje apo nevojë për sqarim shtesë, ju lutemi na kontaktoni në: [email protected].


Ky projekt zbatohet nga GERMIN me mbështetjen nga National Endowment for Democracy (NED).